Urdaibai Bird Center ikerketa-bekak eskatzeko epea ireki da

Urdaibai Bird Center ingurunea. ARGAZKIA: Udaibai Bird Center
Urdaibai Bird Center ingurunea. ARGAZKIA: Udaibai Bird Center

BBN ERREDAKZIOA

BBK Fundazioak eta Urdaibai Bird Center-ek zientziaren ikerketa eta dibulgaziorako bi beka emateko programaren hirugarren deialdia argitaratu dute; ohi bezala, Urdaibaiko Biosferan gauzatuko da programa aurten ere.

Ikerketa eta dibulgazio bekak eskatzeko izena emateko epea irekita dago. Horiek eskuratu nahi dituzten gazteak 25 urtez behekoak izateaz gain, Bizkaian izan behar dute helbide fiskala. Gainera, Biologian edo Ingurumen Zientzietan titulu akademiko ofizial eta homologatuaren jabe izan behar dute, era berean, langabezian egon behar dute ikerketa edo dibulgazio praktika aldia hasten den unean eta, halaber, aurrez BBK Fundazioak finantzaturiko praktika-programaren batean parte hartu gabekoak izan behar dute. Edonola ere, kontuan hartuko dira, bai hizkuntzak (euskara, ingelesa, frantsesa…) jakitea eta bai ornitologian, ekologian eta natura-ingurunean esperientzia zein ezagupenak izatea. 4.500 euro esleituko zaizkio bekadun bakoitzari.

Bekak, antolatzaileen hitzetan, «parte-hartzaileen prestakuntza sustatu nahi du Urdaibai Bird Center-eko ikerketa ildoekin eta hegaztien eta beraien habitat-en ezagutzarekin loturiko lanak eginez». Bederatzi hilabeteko iraupena izango dute eta astean 30 orduko lanaldia osatuko dute beka eskuratzen duten gazteek; apirilean hasi eta abenduan bukatzeko. Parte-hartzaileek praktika eta prestakuntza-lanak egoki gauzatzeaz arduratuko den tutore bat izango dute zentruan.

BBK-Urdaibai Bird Center Ikerketa Beken helburua «gazte langabeei lan-munduan sartzen laguntzea da, beti ere, ikerketa, ekoturismo edo “enplegu berdeak» deiturikoen barruan etorkizun handikoak diren lanetan. Azken batean, natura eta ingurumenarekin erlazionaturiko ikasketetan tituludunei lan-munduan sartzen laguntzea», antolatzaileen hitzetan.

Beka horiek hainbat erakunderen arteko lankidetza akordio baten ondorio dira, besteak beste: Aranzadi Zientzia Elkartea, BBK Fundazioa eta Lanbide-Euskal Enplegu Zerbitzua.

Bekari buruzko argibide guztiak webgune honetan daude eskuragarri: www.becasbbk.es

Deja una respuesta

Tu dirección de correo electrónico no será publicada. Los campos obligatorios están marcados con *