BBN ERREDAKZIOA
Bilbok Dantzaren Nazioarteko Eguna ospatuko du datorren asteazkenean, apirilaren 29an, sortzaileen eta konpainien erakusketarekin. Hala ere, aurrerapen gisa, Bilboko Udaleko Kultura Sailaren esku dagoen BilbaoEszenak -Baliabide Eszenikoen Zentroak-, Eva Guerrero eta Olatz de Andrés artisten topaketa antolatu du datorren astelehenean, apirilaren 27an, dantzaren sorkuntza prozesua aztertzeko. Saioa arratsaldeko 19:30ean hasiko da; sarrera librea izango du, baina beharrezkoa izango da aurretik izena ematea info@addedantza.org helbidean.
Asteazkenean, berriz, apirilaren 29an, Azkuna Zentroak dantza sortzaileen eta konpainien erakusketa antolatu du. Saioa, Sara Paniaguaren Un día / ocho horas performancearekin hasiko da. Artistak 10:00etatik 14:00etara eta 15:00etatik 19:00etara erakutsiko du bere lana ikus-entzuleen aurrean.
Arratsaldeko 18:00etan, aldiz, nazioarteko mezua irakurriko da; eta ondoren, ikus-entzuleek, Feedback konpainia, Horman Poster edo Organik-eko Natalia Monge bezalako artisten lanen zatiez gozatu ahal izango dute, Azkuna Zentroko Kulturen Atarian, arratsaldeko 19:00ak arte. Ordu horretan ikus-entzuleentzat zabalik egongo den elkarrizketa bat hasiko da.
Horrez gain, egun guztian zehar, ADDE-k sortu duen dantza arloko lanen katalogoan agertzen diren konpainien eta sortzaileen dantzen zatiak jasotzen dituen bideoa ikusi ahal izango da Kulturen Atariko pantailan.
