BBN ERREDAKZIOA
Gure Xabiertxo erakusketak, bere garaian, pedagogia berritzaileko lana izan zena omendu nahi du; umeek euskaraz irakurtzen ikasteko XX. mendeko metodo nagusia izan baitzen, eta beronen bidez ikasi baitzuten munduari begiratzen hainbat belaunalditako umeek.
Euskadiko Artxibo Historikoan, martxoaren 12tik ekainaren 23ra ikusgai izango den erakusketan, Xabiertxo liburuaren 11 edizioetako aleak eta audio, bideo zein panel informatiboak aurkituko ditu bisitariak. Liburuaren historia kontatzeaz gain, garai hartako pasadizo historikoei buruzko informazioa ere jasotzen da, baita Xabiertxo liburua pasadizo horien lekuko bihurtu zuten pertsonen berri eman ere.
Horrez gain, 1932tik 1980ra bitartean egindako euskarazko irratsaioetatik ateratako audio batzuk ere jaso dituzte. Esaterako, Arrate Irratiak umeentzat egindako programetatik, edo Karmele Esnalek zinemari eta emakumeei buruz prestatu zituen programetatik. Hain zuzen, euskarazko lehenengo irrati emisioak Xabiertxo liburuak argia ikusi zuen urte berean sortu baitziren, 1925ean.
Inaugurazio ekitaldia gaur egingo dute dute; martxoak 11, Euskadiko Artxibo Historikoan (Maria Diaz de Haro, 3 – Bilbo), arratsaldeko 18:30ean. Gure Xabiertxo erakusketaren inaugurazioan izango dira Bakartxo Tejeria, Eusko Legebiltzarreko presidentea; Cristina Uriarte, Hezkuntza, Hizkuntza Politika eta Kultura sailburua; eta Maria Angeles Garai, San Nikolas Ikastolako andereño izandakoa –Bizkaiko lehen ikastola-, eta urte askoan ikastolako neska-mutikoekin irakaskuntza-metodo nagusi gisa Xabiertxo liburua erabili zuena.
Halaber, Gure Xabiertxo erakusketa Eusko Legebiltzarrak eta Sancho el Sabio Fundazioak antolatu dute, liburua argitaratu zela 90 urte betetzen direnean, eta antolatzaileen hitzetan, erakusketak «liburu bikain bat aurkezten digu, ohikoaz kanpoko historia izan duena, aparteko pertsona batzuei esker egia bihurtua». Eusko Legebiltzarrean pasadan urteko Euskararen Egunean, 2014ko abenduaren 3an, ireki zen erakusketa da gaur inauguratuko dutenaren abiapuntua.
Bertatik bertara ikusteko aukera izango ez duen ororentzat, abian da www.gurexabiertxo.eus web-orria. Bertan, erakusketako materialak kontsulta daitezke, bai eta norbere ekarpena egin ere; horretarako sortu duten blog baten bidez.
